ე.წ კორტების სპეცოპერაციის საქმეზე რიგითი სპეცრაზმელების საქმე ცალკე წარმოებად გამოიყო. შვიდი სპეცრაზმელის საქმის არსებითი განხილვა 24 ივნისს, 11:00 საათზე დაიწყება. თავდაპირველად ბრალი წარედგინა 12 პირს, საიდანაც 11 დააკავეს. თუმცა, პროკურატურის შუამდგომლობის საფუძველზე, თბილისის საქალაქო სასამართლომ ხელმძღვანელი პირების საქმე ცალკე წარმოებად გამოყო, რიგითი სპეცრაზმელების კი - ერთ წარმოებად.
"დღეს დასრულდა წინასასამართლო სხდომა ამ საქმეზე. მოსამართლემ კანონიერად მიიჩნია ჩვენი მტკიცებულებები და საქმე გადავიდა არსებით განხილვაზე. ბრალდებულები საკუთარ პოზიციებს სწორედ არსებითი განხილვის დროს დაკითხვისას დააფიქსირებენ", - განაცხადა პროკურორმა ამირან გულიაშვილმა.
ამასთან, დღევანდელ პროცესზე მოსამართლემ არ დააკმაყოფილა დაცვის მხარის შუამდგომლობა ბრალდებულების მიმართ სისხლის სამართლებრივი დევნის შეწყვეტის თაობაზე. დღესვე, შვიდივე ბრალდებულმა უარი თქვა საქმის ნაფიცი მსაჯულების პირობებში განხილვაზე.
