საქართველოს პრემიერმინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე სერგეი ლავროვს გამოეხმაურა და აღნიშნა, რომ "აღნიშნული რადიკალურად განსხვავებული პოზიციები არ ქმნის "საუკეთესო" ფონს დიალოგის აღსადგენად".
აბაშიძის თქმით, მზა რეცეპტები ამ შემთხვევაში არ არსებობს და დიალოგი აუცილებელია. "ასე გვესახება საქმის ვითარება და პასუხი ბატონ ლავროვის კითხვაზე, თუ კონკრეტულად რის და როგორ გაკეთებას გვთავაზობენ. რაც შეეხება ქართველი ხალხის მიმართ გამოთქმულ სიმპათიებს, გვსურს დავადასტუროთ, რომ რუსი ხალხის მიმართ საქართველოში იყო და არის მეგობრული განწყობა", - აცხადებს ზურაბ აბაშიძე.
პრემიერმინისტრის სპეციალურმა წარმომადგენელმა აღნიშნა, რომ დიალოგის დასაწყებად წინაპირობების წამოყენება არასწორია.
"ოფიციალური თბილისი არ აყენებს არანაირ წინაპირობას ახალი ფორმატის დიალოგის დასაწყებად. ამ კონტექსტში გაუგებარი იქნება, თუკი რუსეთის მხარე მოითხოვს ჩვენგან წინაპირობის სახით ე.წ. ახალი რეალობების აღიარებას, ანუ აფხაზეთისა და სამხრეთ ოსეთის დამოუკიდებლობასთან შეგუებას", - განაცხადა აბაშიძემ.
შეგახსენებთ, რუსეთის ფედერაციის საგარეო საქმეთა მინისტრმა, სერგეი ლავროვმა ბრიუსელში, NATO-რუსეთის საბჭოს თათბირის შემაჯამებელ პრესკონფერენციაზე განაცხადა, რომ საქართველოს ახალი ხელისუფლების რიტორიკა არ შეესაბამება ორ ქვეყანას შორის ურთიერთობების განახლების სურვილს.
"ჩვენი ქართველი მეზობლები აცხადებენ, რომ მათ სურთ რუსეთთან ურთიერთობის ნორმალიზება, მაგრამ ამავე დროს განიხილავენ სამხრეთ ოსეთსა და აფხაზეთს, როგორც ოკუპირებულ ტერიტორიებს. ასეთი რიტორიკა, მაინცდამაინც არ შეესაბამება წინაპირობების გარეშე ურთიერთობების განახლებას. ჩვენ პრაქტიკული კუთხით, ხალხთა შორის პრაქტიკული ურთიერთობის კუთხით გართულებებს ვერ ვხედავთ", - განაცხადა რუსეთის საგარეო საქმეთა მინისტრმა.