ერთიანი ნაციონალური მოძრაობის განცხადებით, შემაშფოთებელია მიუნხენის უსაფრთხოების კონფერენციაზე საქართველოს პრემიერმინისტრის თანამდებობასთან შეუფერებელი და საქართველოს ინტერესების შეუსაბამო მოქმედება. პარტიის მოსაზრებით, ირაკლი ღარიბაშვილმა ვერ შეძლო, გაეცა პასუხი საქართველოსთვის საზიანო, პროპაგანდისტული და ცრუ განცხადებებისთვის.
ნაციონალური მოძრაობა მიიჩნევს, რომ მსოფლიოში ერთ-ერთ ყველაზე მნიშვნელოვან უსაფრთხოების ფორუმზე საქართველოს პრემიერმინისტრის წლევანდელი გამოსვლა კიდევ ერთხელ წარმოაჩენს, რომ საქართველოს ჰყავს არაკომპეტენტური მთავრობის მეთაური, რომელსაც არ აქვს ქვეყნის ინტერესების დაცვის უნარი და საჭირო ცოდნა.
"მიუხედავად იმისა, რომ 2008 წლის რუსეთის აგრესიასთან დაკავშირებით პრემიერის გზავნილი რადიკალურად განსხვავდებოდა ქვეყნის შიგნით მთავრობის გზავნილისგან - რომ ომი სწორედ საქართველომ დაიწყო - პრემიერის უუნარობა, გაეცა პასუხი საქართველოსთვის საზიანო, პროპაგანდისტული და ცრუ განცხადებებისთვის, ვერანაირ კრიტიკას ვერ უძლებს.
მაგალითად, რუსეთის ფედერაციის საბჭოს საგარეო ურთიერთობათა კომიტეტის თავმჯდომარემ, ანტიქართული განწყობებით ცნობილმა კონსტანტინე კოსაჩოვმა კონფერენციის ერთ-ერთ კულმინაციურ მომენტში განაცხადა, რომ აფხაზეთი და ცხინვალის რეგიონი არ უნდა იყოს საქართველოს შემადგენლობაში, რადგანაც ისინი „საქართველოს სტალინმა აჩუქა". ჩვენ იმედი გვქონდა, რომ საკუთარ გამოსვლაში, ფორმალურად მაგრამ მაინც საქართველოს პრემიერმინისტრი ამ ტყუილს გასცემდა პასუხს - იტყოდა, რომ ორივე რეგიონი შედიოდა დამოუკიდებელი და საერთაშორისოდ დე იურე აღიარებული დემოკრატიული საქართველოს საზღვრებში, რომელიც საბჭოთა რუსეთმა სამხედრო აგრესიის გზით დაიპყრო. სამწუხაროდ, ღარიბაშვილმა ამ პრინციპულ ტყუილზე არაფერი თქვა. ამ სიცრუის არუარყოფით კონფერენციის დამსწრეთ დარჩათ შთაბეჭდილება, რომ კოსაჩოვის მტკიცება სიმართლეა და რუსეთმა უბრალოდ დაიბრუნა ის, რაც სტალინმა საბჭოთა საქართველოს „აჩუქა".
ამასთან, პრემიერმა კვლავ არ დაუჭირა მხარი უკრაინის თავდაცვისუნარიანობის გაძლიერებას, რაც საქართველოს ინტერესებს ეწინააღმდეგება.
ბოლოს, როცა პრემიერს ჰკითხეს, თუ რა აზრის იყო კონფლიქტების მოგვარების კონტექსტში ევროკავშირში გაწევრიანების პერსპექტივაზე, მან კითხვა უბრალოდ ვერ გაიგო და უპასუხოდ დატოვა.
მსოფლიოში ერთ-ერთ ყველაზე მნიშვნელოვან უსაფრთხოების ფორუმზე საქართველოს პრემიერმინისტრის წლევანდელი გამოსვლა კიდევ ერთხელ წარმოაჩენს, რომ საქართველოს ჰყავს არაკომპეტენტური მთავრობის მეთაური, რომელსაც არ გააჩნია ქვეყნის ინტერესების დაცვის უნარი და საჭირო ცოდნა", - წერია ნაციონალური მოძრაობის განცხადებაში.
