ატომური ენერგიის საერთაშორისო სააგენტოს (IAEA) თქმით, იაპონიის გეგმა 2011 წელს ცუნამის შედეგად დაზიანებული ფუკუშიმას ატომური ელექტროსადგურის რეაქტორის გასაგრილებლად გამოყენებული წყლის ზღვაში ჩაშვებასთან დაკავშირებით საერთაშორისო სტანდარტებს შეესაბამება.
სააგენტოს დასკვნით, წყლის გაშვებას გარემოზე "უმნიშვნელო" ზეგავლენა ექნება. IAEA-ს დირექტორმა, რაფაელ გროსიმ საკითხზე ორგანიზაციის ორწლიანი მუშაობის შედეგები 4 ივლისს იაპონიის პრემიერმინისტრ ფუმიო კიშიდასთან შეხვედრის დროს გაავრცელა.
ფუკუშიმას ატომური ელექტროსადგურის ექსპლუატაციის შეწყვეტის პროცესი ამ დრომდე მიმდინარეობს და შესაძლოა ათწლეულების განმავლობაში გაგრძელდეს. რეაქტორის გასაგრილებლად გამოყენებული წყლის შესანახად განკუთვნილი რეზერვუარები კი თითქმის სრულად სავსეა, რის გამოც იაპონიის მთავრობამ სამრეწველო ჩამდინარე წყლების ოკეანეში ჩაშვების გადაწყვეტილება მიიღო.
ტოკიოს გეგმას სეული და პეკინი ეწინააღმდეგებიან. ჩინეთმა 3 ივლისს IAEA გააფრთხილა იაპონიის გეგმისთვის მხარი არ დაეჭირა. სამხრეთ კორეამ სურსათის უვნებლობაზე შეშფოთების გამო მარილის მარაგები წინასწარ შეავსო. სამრეწველო წყლების ოკეანეში ჩაშვების გამო ღელავენ ფუკუშიმას მეთევზეებიც, რომლებიც ფიქრობენ, რომ მომხმარებელი მათ პროდუქციაზე უარს იტყვის.
რიხტერის სკალით 9.0 მაგნიტუდის სიმძლავრის მიწისძვრა იაპონიაში 2011 წლის 11 მარტს მოხდა. მიწისძვრას ცუნამი და ნგრევა მოჰყვა, რამაც ფუკუშიმას სადგურზე რეაქტორების დაზიანება და რადიოაქტიური ნივთიერებებით მიმდებარე ტერიტორიის დაბინძურება გამოიწვია. კატასტროფის ზონიდან 150 000-ზე მეტი ადამიანი გაიყვანეს.
ფუკუშიმას დაზიანებით გამოწვეული ზარალის ანაზღაურება და დაბინძურებული გარემოს დასუფთავება იაპონიის მთავრობას ტრილიონობით იენი დაუჯდა და შესაძლოა პროცესი 40 წლის განმავლობაში გაგრძელდეს. ფუკუშიმას აფეთქება ჩერნობილის შემდეგ ყველაზე მასშტაბურ ატომურ კატასტროფადაა მიჩნეული.
