თბილისის საქალაქო სასამართლომ საერთაშორისო გამჭვირვალობა-საქართველოს სარჩელი დააკმაყოფილა, რომლითაც ორგანიზაცია ფინანსთა მინისტრის ნოდარ ხადურის მიერ 2013 წლის 25 იანვარს გამოცემული #30 ბრძანების გაუქმებას ითხოვდა.
"ამ ბრძანებით დადგენილმა ახალმა რეგულაციებმა საქონლის გადაზიდვის საქმიანობით დაკავებულ მცირე და საშუალო მეწარმეებს სერიოზული პრობლემები შეუქმნა და მონოპოლიურ მდგომარეობაში ჩააყენა საქართველოს ფოსტა", - ნათქვამია ორგანიზაციის მიერ გავრცელებულ განცხადებაში.
გადაწყვეტილება ჯერ კანონიერ ძალაში არ არის შესული. სასამართლოს გადაწყვეტილების გასასაჩივრებლად ფინანსთა სამინისტროს მისი გაცნობიდან 14 კალენდარული დღე აქვს.
8 მაისს ნოდარ ხადურმა ხელი მოაწერა ბრძანებას, რომელიც აუქმებს ადრე მიღებულ რეგულაციებს, რომელთა აღსრულების შედეგად მნიშვნელოვანი პრობლემები შეექმნათ ადგილობრივ მცირე და საშუალო გადამზიდველებს, საქართველოს ფოსტა კი უპირატეს მდგომარეობაში იქნა ჩაყენებული.
TI-საქართველო გავრცელებულ განცხადებაში აღშფოთებას გამოთქვამს იმის გამო, რომ რეგულაციები უქმდება არა მყისიერად, არამედ მხოლოდ 2014 წლის 1 იანვრიდან, "მაშინ, როდესაც ბაზარზე მცირე და საშუალო გადამზიდველები სავარაუდოდ აღარც იარსებებენ".
ორგანიზაცია სამინისტროს მიერ ამ რეგულაციების შემოტანას თავიდანვე აკრიტიკებდა და ბრძანების გაუქმების მოთხოვნით სასამართლოში საჩივარიც შეიტანა.