ტიტანიკის მახლობლად ჩაძირული წყალქვეშა ნავის, ტიტანის ნარჩენები ოკეანის ფსკერიდან ხმელეთზე ამოიტანეს.
ნარჩენები კანადაში, ნიუფაუნდლენდისა და ლაბრადორის პროვინციაში მდებარე პორტში მიიტანეს. კომპანიაში, Pelagic Research Services-ში, რომელსაც წყალქვეშა ნავი ეკუთვნოდა, ამბობენ, რომ ტიტანთან დაკავშირებულ გამოძიებაზე ამ ეტაპზე ვერაფერს იტყვიან, რადგან მათი ჯგუფი "კვლავ მისიაზეა". გამოძიებაში ჩართული არიან აშშ-სა და კანადის სახელმწიფო სააგენტოები.
დისტანციურად მართვადი წყალქვეშა ნავის ნარჩენები 3 810 მეტრის სიღრმეზე, ჩაძირული ტიტანიკიდან 488 მეტრის დაშორებით იპოვეს.
აშშ-ს სანაპირო დაცვის წარმომადგენლები ამბობენ, რომ ხომალდის ნარჩენების გაანალიზებამ შესაძლოა გამოძიებას მნიშვნელოვანი სამხილები მისცეს. არ გამორიცხეს ელექტრონული ინფორმაციის შემორჩენის შესაძლებლობაც.
ტურისტული კომპანია OceanGate Expeditions-ის ცნობით, დაკარგული წყალქვეშა ნავის პილოტი და ოთხივე მგზავრი დაიღუპა. ამის შესახებ ინფორმაციას ავრცელებს აშშ-ის სანაპირო დაცვაც.
წყალქვეშა ნავი იმყოფებოდა OceanGate Expeditions-ის მიერ ორგანიზებულ 8-დღიან ექსპედიციაზე, რომლის ფარგლებში ბორტზე მყოფ ადამიანებს ატლანტის ოკეანეში 3 800 მეტრ სიღრმეზე მყოფი ტიტანიკის ნამსხვრევები უნდა დაეთვალიერებინათ. 18 ივნისს კვლევითმა ხომალდმა Polar Prince-მა ნავ Titan-ის ეკიპაჟთან კონტაქტი წყალქვეშ გატარებული 1 საათისა და 45 წუთის შემდეგ, ადგილობრივი დროით დაახლოებით 09:45 საათზე დაკარგა.
აშშ-ს სანაპირო დაცვის თქმით, მათ პრობლემის შესახებ დაახლოებით 17:45 საათზე –კონტაქტის დაკარგვიდან რვა საათის შემდეგ შეატყობინეს, რის შემდეგაც დაიწყო სამძებრო სამუშაოები.
