გრიგოლ ვაშაძის თქმით, "თუ ივანიშვილი პრეზიდენტის პოსტს ხელში ჩაიგდებს, იმ წამში დააბრუნებენ კანაფის კანონპროექტს".
პრეზიდენტობის კანდიდატმა ბრიფინგი მას შემდეგ გამართა, რაც ცნობილი გახდა მთავრობის გადაწყვეტილება, რომ კანაფის ექსპორტის და კულტივაციის შესახებ კანონპროექტს პარლამენტიდან გაიწვევენ.
ვაშაძე ფიქრობს, რომ ეს გადაწყვეტილება საზოგადოების გამარჯვებაა.
„დღეს ხელისუფლებამ ვერ გაუძლო საქართველოს მოქალაქის წნეხს, რომელმაც კიდევ ერთხელ აჩვენა თავის ძალა და ეს არის საქართველოს ყველა მოქალაქის, სამოქალაქო საზოგადოებისა და გაერთიანებული ოპოზიციის გამარჯვება. თუ მათ პრეზიდენტის პოსტი ჩაიგდეს ხელში იმ წამში დააბრუნებენ ამ კანონპროექტს. რადგან ოლიგარქი არ იტყვის უარს, როგორც ის თავად ამბობდა 500% მოგებაზე", - თქვა ვაშაძემ.
საპატრიარქოში დღეს გამართულ შეხვედრაზე, რომელსაც გიორგი გახარია და ირაკლი კობახიძე დაესწრნენ, გადაწყდა, რომ მთავრობა მთავრობა კანაფის კულტივაციის კანონპროექტს მთავრობა პარლამენტიდან გამოიწვევს.
შეხვედრის დასრულების შემდეგ შს მინისტრმა, გიორგი გახარიამ თქვა, რომ არსებული პოლიტიკური კონტექსტიდან, მათ შორის არჩევნებიდან გამომდინარე, ამ საკითხზე კონსენსუსის მიღწევა შეუძლებელია და ეს გადაწყვეტილებაც ამიტომ იქნა მიღებული.
საქართველოს მთავრობამ რამდენიმე კვირის წინ განაცხადა, რომ მარიხუანას საექსპორტო პოტენციალს სწავლობს - განიხილებოდა მოდელი, რომლის მიხედვითაც საქართველოში მოიყვანენ და გადაამუშავებენ მარიხუანას, რომელიც სამედიცინო მიზნებისთვის იქნება განკუთვნილი. გადამუშავებული პროდუქტი კი ექსპორტზე გავიდოდა.
ამ ინიციატივიდან გამომდინარე, საკანონმდებლო ცვლილებები მოამზადა შინაგან საქმეთა სამინისტრომ, რომელთა მიხედვითაც, მარიხუანას მოხმარება მკაცრ სამართლებრივ ჩარჩოებში უნდა მოქცეულიყო.
ფინანსთა მინისტრმა კი თქვა, რომ მარიხუანას სამედიცინო მიზნებისთვის ექსპორტით ქვეყანა 1 მილიარდს იშოვიდა.
ინიციატივას საზოგადოების ნაწილის მხრიდან წინააღმდეგობა შეხვდა. სასულიერო პირების ნაწილმა მთავრობის ინიციატივა გააკრიტიკა და პარაკლისიც გადაიხადა. წინააღმდეგი იყო მეუფე იაკობიც. საქართველოს კათალიკოს-პატრიარქმა, ილია მეორემ კი თქვა, რომ "სამშობლოსთვის გული ხელისუფლებასაც შესტკივა".
მაშინ მმართველმა გუნდმა პარლამენტში კანონის განხილვა შეაჩერა, თუმცა არ გაუწვევია.
გუშინ, 1-ლ ნოემბერს პრესკონფერენცია მოიწვიეს ძალადობრივ ჯგუფის, ქართული მარშის წევრებმა და თქვეს, რომ საპრეზიდენტო არჩევნების მეორე ტურში სალომე ზურაბიშვილს მხარს დაუჭერდნენ, თუ ხელისუფლება ორ პირობას შეასრულებდა, მათგან ერთ-ერთი სწორედ კანაფის კულტივაციის კანონპროექტის გაწვევაა.
